Policia e Kosovës përmes një njoftimi ka demantuar disa mediume kryesisht serbe, që sipas tyre, janë duke shpërndarë informata të rreme për arrestime të tjera të policëve serbë në veri.

PK bënë të ditur se këtë herë bëhet fjalë për kinse një tjetër arrestim të një ish-polici serb (Z.M) në Mitrovicë të Veriut.

“Spekulimet e radhës nga mediumet serbe janë se kinse Policia e Kosovës edhe sot ka arrestuar një person (ish policin Z.M,) në Mitrovicë Veri, si dhe kinse Policia e Kosovës, në Veri të vendit ka penguar punonjësit e elektrodistribucionit për të kryer riparime të një defekti në rrjetin elektrik”, thuhet në reagim transmeton arbresh.info.

Ata kanë bërë të ditur se ky lajm nuk është i vërtetë, të paktën jo sipas informatave zyrtare të tanishme që posedon Policia e Kosovës.

“Edhe një herë, demantojmë këto spekulime, duke sqaruar se nuk ka informacione zyrtare nga Policia e Kosovës për një arrestim të personit në fjalë, si dhe Policia e Kosovës nuk ka penguar dhe nuk pengon në asnjë rrethanë, asnjë institucion apo punonjës të cilët kryejnë detyrat zyrtare, përkundrazi në rastin konkret janë ndërmarr veprime në bashkëveprim me kompetentët për adresimin dhe sanimin e këtij problemi në rrjetin elektrik”, bëhet e ditur në komunikatën e PKsë.

Reagimi i plotë:

Policia e Kosovës, përmes njoftimeve të vazhdueshme tregon se është mjaft transparente dhe mban të informuar mediat dhe opinionin e gjerë lidhur me veprimet policore në nivel vendi, duke përfshirë edhe rastet ku kemi të bëjmë me arrestime të personave të dyshuar, ashtu siç e ka bërë të ditur edhe arrestimin e ndodhur mbrëmë të personit të dyshuar S.T, mashkull kosovar serb, i dyshuar për veprën penale “krime lufte kundër popullsisë civile”.

Përmes këtyre njoftimeve zyrtare kemi për qëllim të mbajmë të informuar opinionin dhe mediat mbi realitetin dhe informatat zyrtare, dhe njëkohësisht të demantojmë spekulimet dhe dezinformatat e disa mediave (kryesisht serbe), të cilat në vazhdimësi në forma të ndryshme përmes spekulimeve dhe informatave jo zyrtare po tentojnë të destabilizojnë edhe më tej situatën si dhe të keq informojnë opinionin e gjerë.

Spekulimet e radhës nga mediumet serbe janë se kinse Policia e Kosovës edhe sot ka arrestuar një person (ish policin Z.M,) në Mitrovicë Veri, si dhe kinse Policia e Kosovës, në Veri të vendit ka penguar punonjësit e elektrodistribucionit për të kryer riparime të një defekti në rrjetin elektrik.

Edhe një herë, demantojmë këto spekulime, duke sqaruar se nuk ka informacione zyrtare nga Policia e Kosovës për një arrestim të personit në fjalë, si dhe Policia e Kosovës nuk ka penguar dhe nuk pengon në asnjë rrethanë, asnjë institucion apo punonjës të cilët kryejnë detyrat zyrtare, përkundrazi në rastin konkret janë ndërmarr veprime në bashkëveprim me kompetentët për adresimin dhe sanimin e këtij problemi në rrjetin elektrik.

Inkurajojmë qytetarët dhe mediat që të bashkëpunojnë me Policinë e Kosovës në adresimin e kërkesave dhe konfirmimin e informatave zyrtare dhe mos të bien pre e dezinformatave të tilla./arbresh.info/